Uppfærslur

Hvað er nýtt í Kling

Allt sem við höfum sent út, í öfugri tímaröð. Engin marketing-froða, bara það sem breyttist og hvers vegna það skiptir máli.

8. september 2026

Endurtekin framlög og WooCommerce áskriftir

Endurteknar greiðslur urðu miklu einfaldari í þetta skiptið. Frjáls framlög geta núna verið vikuleg, mánaðarleg eða árleg, WooCommerce vörur geta selst sem áskrift, og það er auðveldara að halda utan um áskriftirnar sem þú ert nú þegar með.

Frjáls framlög geta verið endurtekin

Frjálsar greiðslur eru komnar úr beta og aðgengilegar öllum. Deildu einni síðu og leyfðu fólki að greiða það sem það vill, með stilltum upphæðum eða sinni eigin.

Nýja atriðið er tíðnin. Þú velur hvort síðan rukki vikulega, mánaðarlega eða árlega, og getur leyft greiðandanum að velja á milli staks framlags og endurtekins á síðunni sjálfri. Endurtekið framlag verður að alvöru áskrift sem endurnýjar sig sjálf, reynir aftur ef kortið klikkar og er hægt að segja upp á Mínum síðum. Markmiðamælir, QR-kóði til niðurhals og sýnilegt VSK-þrep fylgja með.

WooCommerce áskriftir

Hakaðu við Kling subscription á WooCommerce vöru, veldu tímabil, og varan selst sem áskrift. Kling sér um dagsetningarnar, kortauppfærslur og endurtilraunir þegar greiðsla mistekst, og WooCommerce fær eina greidda pöntun á hvert tímabil. Viðskiptavinir þínir sjá sjálfir um áskriftina sína á Mínum síðum, í gegnum hnapp á pöntuninni.

Þú þarft ekki WooCommerce Subscriptions viðbótina. Náðu í útgáfu 1.4.0 á download.kling.is/woocommerce.

Auðveldara að halda utan um áskriftir

Breyttu því sem áskrift rukkar - opnaðu áskrift og breyttu upphæðinni, án þess að búa vöruna á bak við hana til upp á nýtt.
Viðvörun þegar endurnýjun mistekst - viðskiptavinurinn fær póst og er beðinn um að laga kortið, í staðinn fyrir að detta hljóðlaust út.
Áskriftaskýrslur - sjáðu hvað er að byrja, hvað er að hætta og hvað heldur, mánuð fyrir mánuð.
Listi sem hægt er að þrengja - síaðu áskriftir eftir dagsetningu og greiðsluleið, með almennilegri síðuflettingu á löngum listum.

Þitt vörumerki á öllu sem viðskiptavinir sjá

Póstar koma frá þér - póstar til viðskiptavina bera nafn fyrirtækisins þíns sem sendanda og þitt netfang í Reply-To, svo svörin berast til þín en ekki okkar.
Þitt eigið merki - hlaðið upp merkinu sem mynd í staðinn fyrir að líma inn slóð, og það birtist á greiðslusíðunni, kvittunum og í póstum.
Kvittanir á íslensku - kvittanapóstar eru sjálfgefið á íslensku, og það er rofi í Stillingum ef þú vilt frekar sleppa því að senda þær.

Félög og viðburðir

Tengdu félag við viðburð og meðlimir fá sitt verð sjálfkrafa við skráningu, alveg niður í frían miða ef félagsverðið er 0 kr. Allir aðrir greiða venjulegt verð. Engir kóðar til að dreifa og engin sérstök síða fyrir meðlimi.

Skráningar á viðburði má líka greiða með kröfu, og þátttakendalistinn fékk síur og Excel útflutning.

Félög fengu líka nokkrar nýjungar:

Meðlimalisti sem hægt er að vinna í - leitaðu í honum, síaðu eftir stöðu og greiðslumáta, og flyttu hann út.
Aðild sem greiðist einu sinni - fyrir inntökugjöld eða félag sem stendur eina önn og á að rukka einu sinni, án endurnýjunar.
Setja félag í geymslu - komdu félagi sem hefur lokið sínu hlutverki úr augsýn án þess að tapa sögunni.
Síða fyrir meðlimina þína - meðlimir skrá sig inn og sjá hvað aðildin gefur þeim, og þú getur opnað síðuna eins og meðlimurinn sér hana til að hjálpa í síma.

EUR og USD

Kling er ekki lengur bara í krónum. Greiðslusíðan, kvittanir, reikningar, póstar til viðskiptavina og tölurnar á stjórnborðinu ráða núna við EUR og USD, og hver gjaldmiðill er lagður saman fyrir sig. Við kveikjum á gjaldmiðli með þér, svo sendu okkur póst ef þú selur út fyrir landsteinana.

Vefsíða, í beta

Hýst vefverslun tengd vörunum þínum og greiðslusíðunni, sem þú breytir með því að tala við gervigreind, og þú getur beint þínu eigin léni á hana. Hún er ekki sjálfsafgreidd ennþá, svo svaraðu þessum pósti ef þú vilt prófa.

Greiðslusíðan

Höfnun sem segir eitthvað - hafnað kort útskýrir sig á mannamáli, og útrunnið kort er stöðvað áður en viðskiptavinurinn er sendur í gegnum 3DS.
Betri í síma - greiðsluskrefið var endurunnið fyrir litla skjái, og villuskilaboð í reitum tala rétta tungumálið.

Á stjórnborðinu

Sjáðu hvað fólk skrifaði í greiðsluferlinu - greiðslusíðan sýnir svörin við sérsniðnu reitunum þínum.
Fleiri API lyklar, með merkimiðum - nefndu lyklana eftir tengingum og gefðu út lykla með lesaðgangi fyrir það sem á aldrei að skrifa neitt.
Skýrari villur í kröfum - þegar bankinn hafnar kröfu færðu setningu sem þú getur brugðist við í staðinn fyrir kóða, og ómögulegar kennitölur eru stöðvaðar áður en þær eru sendar.
Hraðari viðskiptavinalisti - hann var þungur á stórum reikningum. Það er hann ekki lengur.

Fyrir forritara

Núna er komin MCP tenging: límdu eina slóð inn í Claude eða ChatGPT og aðstoðarmaðurinn getur lesið Kling gögnin þín. Lyklar með lesaðgangi fá bara lesverkfæri, svo lykillinn sem þú lætur hann fá ræður í hvað hann kemst.

Líka nýtt: `/v1/reports` endapunktar með lesaðgangi, `GET /v1/payment-intents` listi, `claim.created` og `claim.paid` vefkrókar, vefkrókar þegar endurnýjun mistekst, þegar endurtilraun tekst og þegar sagt er upp á Mínum síðum, og idempotency lag sem geymir ekki lengur misheppnað svar undir lyklinum þínum.

Ef eitthvað er bilað eða vantar, sendu okkur endilega póst á hallo@kling.is. Við lesum allt sem kemur inn.

26. júní 2026

Viðburðir komnir í loftið hjá Kling

Önnur Kling lausnin er komin í loftið. Viðburðir sjá um allt frá gerð skráningarsíðu að innrituninni við dyrnar, allt á einum stað.

Viðburðir, önnur Kling lausnin

Kveiktu á Viðburðum í Lausnir og þú færð viðburðasíðu, skráningarflæði, miða og innritunarskanna. Ókeypis viðburðir, seldir viðburðir, eða blanda. Ekkert annað tól sem þú þarft að tengja.

Hvort sem þetta er 200 manna námskeið, mót með 14 barnaliðum eða árshátíð hjá félagi, þá lifir allt ferlið inn á Kling stjórnborðinu.

Hvað þú getur gert núna

Hver viðburður er ein síða í stjórnborðinu sem heldur utan um:

Viðburðasíðu - lifir á hreinni Kling slóð, notar þitt útlit, skiptir á milli íslensku og ensku með tungumálavalinu. Bættu við mynd, settu inn tengil á Google Maps, ákveddu hvenær skráning opnar.
Ókeypis eða selda skráningu - stilltu verð á miða (eða leyfðu honum að vera ókeypis), og við söfnum réttum upplýsingum eftir því.
Sérsniðna skráningarreiti - spyrðu um bolastærð, mataræði, fæðingarár barns, hvað sem viðburðurinn þarf.
QR-miða með tölvupósti, og prentvænt PDF - hver skráning sendir staðfestingarpóst með QR-kóða. Það er líka prentvæn PDF útgáfa, fyrir þá sem prenta ennþá. Við þekkjum öll einn þannig.
Innritunarskanna í símanum - opnaðu skannasíðuna, skannaðu á QR-kóðann, og þátttakandinn innritast.
Þátttakendalista sem uppfærist - listinn uppfærist við hverja innritun, svo allir eru á sömu blaðsíðu varðandi stöðu gesta.
Stýringu á hverjum þátttakanda - opnaðu þátttakanda, breyttu upplýsingum, sendu miðann aftur, hættu við skráninguna eða skoðaðu greiðslustöðuna á stjórnborðinu.

Hvar er þetta?

Þú finnur þetta í Viðburðir undir Lausnir á stjórnborðinu. Aðgengilegt öllum söluaðilum fyrir 3.490 kr. á mánuði. Þú getur byrjað að fikta strax í dag.

Uppfært "Fara live" ferli og kröfuþjónusta

Við erum búin að uppfæra ferlið til að taka á móti raunverulegum greiðslum. Nú getur þú bæði sótt um að taka á móti kortagreiðslum og að senda kröfur í heimabanka viðskiptavina þinna. Ef þú ert ekki búinn að klára ferlið eða vilt bæta við nýrri greiðsluleið getur þú gert það hér -> https://kling.is/dashboard/go-live

Aðgangs- og teymisstýring

Núna geturðu eytt Kling reikningnum þínum úr stjórnborðinu, með biðtíma ef þú skiptir um skoðun. Teymin fengu líka það sem vantaði: fara úr söluaðila, færa eignarhald á samstarfsfélaga, og vörn sem kemur í veg fyrir að síðasti eigandinn loki óvart alla úti.

Skýrari staða á greiðslulistanum

Gamla "Ógreitt" merkið er núna þrjú merki: Yfirgefið (viðskiptavinurinn kláraði aldrei kaupferlið), Reynt (kort var reynt og hafnað) og Útrunnið (24-tíma greiðslufresturinn rann út). Síaðu greiðslurnar eftir þessum merkjum fyrir enn skýrari mynd af ógreiddum greiðslum viðskipavina þinna.

Ef eitthvað er bilað eða vantar, sendu okkur endilega póst á hallo@kling.is. Við lesum allt sem kemur inn.

8. maí 2026

Kling lausnir, félög & klúbbar og WooCommerce

Sex vikur liðnar frá opnun. Hér er yfirlit yfir það sem við höfum smíðað, allt á mannamáli.

Lausnir, byrjun á markaðstorgi

Kling er ekki lengur bara API og greiðslusíða. Við erum byrjuð að bjóða upp á lausnir, tilbúin verkfæri sem þú kveikir á með einum smelli þegar þú þarft þau, og slekkur á þegar þú ert hætt/ur.

Klúbbar & félög er fyrsta Kling lausnin

Ef þú rekur íþróttalið, nemendafélag, skátahóp, kórstarf, stjórnmálaflokk eða hvers kyns félag, þá hefurðu líklega verið í basli með Excel fyrir félagaskrá, tölvupóstsendingar fyrir fréttabréf, og greiðslulausn sem passar aldrei alveg. Við smíðuðum einn stað fyrir allt þetta saman.

Meðlimir skrá sig inn með símanum, ekkert lykilorð, ekkert app. Foreldrar greiða fyrir börnin sín og sjá sínar eigin greiðslur án þess að deila innskráningu. Sendu tilkynningar með tölvupósti eða SMS beint úr stjórnborðinu. Endurtekin gjöld, mismunandi aðildarflokkar, staða félaga uppfærist sjálfkrafa, allt á einum stað.

Kveiktu á Klúbbar & félög í Kling lausnir.

Hvað er á leiðinni

Donations fyrir söfnunarsíður, Events fyrir miðasölu og skráningar, Pick & Pack fyrir verslanir sem senda áþreifanlegar vörur, og Storefronts fyrir þá sem vilja selja margar vörur á einfaldan hátt. Þau munu birtast á sínum stað í stjórnborðinu þegar þau eru tilbúin.

Þægilegra að skrá sig

Núna er ennþá þægilegra að sækja um færsluhirðingu og við hjálpum þér í gegnum allt ferlið. Við vitum að þetta getur orðið yfirþyrmandi, og þess vegna brjótum við ferlið niður í skref sem þú getur fylgst með í stjórnborðinu.

Við notum líka gervigreind til að semja uppkast að söluskilmálum byggt á því sem þú segir okkur um reksturinn. Þú lest yfir, breytir og samþykkir. Engin þörf á lögfræðingi, í flestum tilfellum.

WooCommerce, engin tengivinna

Ef þú selur í gegnum WordPress + WooCommerce, þá þarftu ekki að tengja neitt. Sæktu viðbótina á download.kling.is/woocommerce, hentu henni inn á vefinn þinn, og þú ert farin/n að taka við Kling-greiðslum.

Endurgreiðslur þar sem þú átt von á þeim

Opnaðu hvaða greiðslu sem er, ýttu á endurgreiða. Alveg eða að hluta, einfalt og þægilegt. Þetta svarar algengustu spurningunni úr fyrstu vikunum: „en hvar endurgreiði ég?“

Settu upp í prófun, virkjaðu með einum smelli

Settu upp vörur, greiðsluhlekki og afsláttarkóða í prófunarumhverfi. Þegar þú ert tilbúin/n, afritarðu þetta allt yfir með einum takka. Slepptu því að gera sama hlutinn tvisvar.

Smátt en gott

Samþykki fyrir skilmálum í kassa þegar þú krefst þess. Greiðsluhlekkir muna tungumálið hjá viðskiptavinum milli heimsókna. „Gleymt lykilorð“ virkar loksins (afsakið að það gerði það ekki).